މިސްބާޙް މުޖުތަބާ

ޒުވާނުންގެ ކުރިމަގު އުޖާލާކުރުމަށްޓަކައި އާމްދަނީއާއި ވިޔަފާރީގެ ފުރުސަތުތައް ފަހިކުރުން

ރަށުގެ ޒުވާން ޖީލަށް އާމްދަނީއާއި ވިޔަފާރީގެ ފުރުސަތުތައް ރަށުގެ ފެންވަރުގައި އޮތް މިންވަރު ދެނެގަނެ، ކަމުގެ މާހިރުންގެ ލަފައާއި އިރުޝާދާއެކު އިޤްތިސާދީ ހަރަކާތްތައް އިތުރުކުރުމަށްޓަކައި ޒުވާނުންނަށް ވިޔަފާރީގެ އާ ފުރުސަތުތަކެއް ހޯދައިދީ، އެކަމަށް ބޭނުންވާ މާލީ އެހީއާއި ފަންނީ އެހީ ކަމާބެހޭ ސަރުކާރުގެ ވުޒާރާތަކާ ގުޅިގެން ހޯދައިދިނުން. މިސާލަކަށް، ސީ ގްރާސް އާލާކުރުމާއި، މޫދުވިނަ ހެއްދުމާއި، އަދި މީގެ އިތުރުންވެސް ފަޅު ގޮވާންކުރުމުގެ އެކި ޕްރޮޖެކްޓްތައް ރަށު ފެންވަރުގައި ހިންގުމަށް ބޭނުންވާނެ ވަސީލަތްތަކާއި ތަމްރީނުތަކާބެހޭ ދިރާސާއެއް ކޮށް، މިފަދަ ޕްރޮޖެކްޓުތަކުގެ ތެރެއިން ޒުވާނުން އެންމެ ޝައުޤުވެރިކަން ހުރި އަދި ކާމިޔާބުކަމާއެކު ހިންގިދާނެ ޕްރޮޖެކްޓުތަކަށް ކައުންސިލުގެ ފަރާތުން ފަންޑް ކުރުން.

ދަނޑުވެރިކަން އާ ހަރުފަތަކަށް

ރަށުގެ ދަނޑުވެރިކަމަށް މިވަގުތު ދިމާވެފައިވާ އެންމެ ބޮޑު އެއް ހުރަހަކީ ބިމުގެ ދަތިކަމާއި ފަންނީ ތަމްރީނު ލިބިގަތުންކަމަށްވުމުން، އަޅުގަނޑުމެންގެ ކައުންސިލެއްގައި ރަށަށް މުޅިން އަލަށް ވާޓިކަލް ފާމިން (ހައިޑްރޯޕޯނިކްސް، އެކުއާޕޯނިކްސް) ތަޢާރަފުކޮށް، ޒަމާނީ ވަސީލަތްތަކާއި އުކުޅުތަކާއެކު އަޅުގަނޑުމެންގެ ދަނޑުވެރިންނަށް ދިވެހިރާއްޖޭގެ އެކި ކަންކޮޅުތަކުން ދަނޑުވެރިކަމުގެ މަސައްކަތުގެ ތަޖުރިބާކާރު ފަރާތްތައް ގެނެސް، މި ފަންނުގެ ތަމްރީނު އެންމެ ފުރިހަމައަށް ފޯރުކޮށްދިނުން.

ވިޔަފާރިތަކަށް ލުއި ފަސޭހަ ގޮތްތައް ހޯދައިދިނުން

ރަށުގެ ވިޔަފާރިވެރިންނަށް ލުއި ފަސޭހަ އަދި ވިޔަފާރީގެ މަންފާ އިތުރުކުރެވޭނެ ގޮތްތައް ކައުންސިލުން ފަހިކޮށްދީ، ކުދި އަދި މެދު ފަންތީގެ ވިޔަފާރިތައް ގިނަކުރުމާއެކު، އަތޮޅު ފެންވަރުގައި ވިޔަފާރިކުރެވޭނެފަދަ މަތީ ފަންތީގެ ވިޔަފާރިތައް ރަށަށް ތަޢާރަފުކުރުމަށް މަސައްކަތްކުރުން. މިގޮތުން މިސާލަކަށް، ރަށަށް ވެއަރހައުސިން އަދި ކޯލްޑް ވެއަރހައުސިން ތަޢާރަފުކޮށްދިނުން. މީގެ ސީދާ ނަތީޖާއެއްގެ ގޮތުން، ވިޔަފާރިވެރިން ގުދަންކުރުމަށާއި ކަރަންޓަށް ކުރާ ޚަރަދު އެތައް ގުނަ ކުޑަވެގެންދާނެ.

ލޯންޗު އަދި ޑިންގި ބަނުމުގެ ސިނާއަތެއް އުފެދުމަށް އެހީތެރިވުން

ލޯންޗު ބަނުމާއި އަދި ޑިންގީ ބަނުމުގެ މަސައްކަތް ކުރުން މާމެންދޫގައި ފެށިގެން ގޮއްސިނަމަ، މާމެންދޫގެ ރައްޔިތުންނަށް ޚާއްސަކޮށް ޒުވާނުންނަށް އާމްދަނީ ހޯދޭނެ އާ މަގެއް ހުޅުވިގެންދިއުން. މި މަސައްކަތް ކުރިއެރުވުމަށްޓަކައި، އިންޑަސްޓްރީގެ މައުލޫމާތު ޝައުޤުވެރިވާ ފަރާތްތަކާ ހިއްސާކުރުމާއެކު، ކައުންސިލުން ރީޒަނަބަލް އަގުތަކެއްގައި ބިން ދިނުން. މި ސިނާއަތް ކުރިއަރައިގެން ގޮސްފިނަމަ، މީގެ ސަބަބުން ނުސީދާ ގޮތުން ސްޕޯޓްސް ފިޝިން އަދި ފަރުމަސްވެރިކަމާއި ލަނޑާ ނެގުމުގެ އިންޑަސްޓްރީއަށް ކުރިއެރުން ލިބިގެންދިއުން.

ސްކޫލު ކުދިންގެ ހުނަރު ކުރިއެރުވުން

ސްކޫލާއި، ޕޮލިހުން އަދި އެންޖީއޯތަކާއި ގުޅިގެން ހުނަރު ތަރައްޤީކުރުމުގެ ޕްރޮގްރާމްތައް ކުރިއަށްގެންދިއުން. ޚާއްސަކޮށް ސޮފްޓް ސްކިލްއާއި، ރިވެތި އަޚްލާޤާއި ނަމާދު ޕްރޮގްރާމްތައް. މިގެ ސަބަބުން ސްކޫލް ނިންމާ ދަރިވަރުންނަކީ އަޚުލާޤު ރަނގަޅު، ދީންވެރި އަދި ހުނަރުވެރި، ކެރޭ ކުދިންތަކެއް ބިނާވެގެންދާނެއެވެ.

އިންޓާންޝިޕް އަދި ހުނަރު ދަސްކޮށްދިނުމުގެ ޕްރޮގްރާމްތައް

ގްރޭޑް 10 ނިންމާ ދަރިވަރުންނަށް ޚާއްސަކޮށްގެން ސަރުކާރުގެ ކުންފުނިތަކާއި ވުޒާރާތަކާއި ގުޅިގެން ޒުވާނުންނަށް ވަޒީފާގެ ތަޖުރިބާ ހޯދައިދިނުމުގެ ގޮތުން މަސައްކަތުގެ މާހައުލުގެ ތަޖުރިބާ ކުރުމަށް ޕްރޮގްރާމް ހިންގުން. މީގެ ސަބަބުން ސްކޫލް ނިމޭ ދަރިވަރުންނަށް އެ ލިބޭ ވަގުތުތައް މަންފާކުރުވަނިވި ގޮތުގައި ހޭދަކުރެވި، މި ތަޖުރިބާތަކުގެ އަލީގައި މި ދަރިވަރުންނަށް ވަޒީފާ ހޯދުމަށް ފަސޭހަވުމާއި ވަޒީފާގެ މާހައުލުގައި އުޅެން ދަސްވުން. ޒުވާނުންނަށް އާ ހުނަރުތައް ދަސްކޮށްދިނުމަށް ކައުންސިލުން ކޮންމެ އަހަރަކުވެސް ކޮންމެވެސް އެއް ޕްރޮގްރާމެއް ހިންގުމަށް މަސައްކަތްކުރުން. މިސާލަކަށް: ލިޔެލާ ޖެހުން، ކަރަންޓު މަސައްކަތްތައް..

ޒުވާނުން މަސްތުގެ ވަބާއިން ސަލާމަތްކުރުން

މަސްތުގެ ވަބާގައި ޖެހިފައި ތިބި ކުދިން މަސްތުން ހުއްޓުވުމަށްޓަކައި ޕޮލިހުންނާއި ޑިޓޮކްސް އާއި ގުޅިގެން އިތުރަށް މަސައްކަތްކުރުން. އަދި މިކަމަށް އިތުރަށް މަގުފަހިކުރުމަށްޓަކައި މި މަސައްކަތް ކުރުމަށް ޝައުޤުވެރިވާ ފަރާތްތަކާއިއެކު ޓާސްކްފޯސްއެއް ޤާއިމުކުރުން.

ރަށުގައި ނާސަރީ ތަޢުލީމު ކަށަވަރުކުރުން

ތުއްތު ކުދިންނަށް ބޭބީ ނާސަރީ އަދި ނާސަރީ ކުލާސްތަކުގެ ޚިދުމަތް ރަށުގައި ލިބިގެންދިއުން ކަށަވަރުކުރުން.

ކިޔެވުމުގެ އުނިކަންހުންނަ ކުދިން ދެނެގަތުމާއި ހޭލުންތެރިކުރުުން

ކިޔެވުމުގެ އުނިކަންހުންނަ ކުދިން ދެނެގަތުމާއި ހޭލުންތެރިކުރުމުގެ ޕްރޮގްރާމްތައް ހިންގުން ތުއްތު ކުދިންނަށް ދިމާވާ އެކި އެކި މައްސަލަތައް (މިސާލަކަށް: އޭޑީ، އެޗްޑީ، އޯޓިޒަމް، ސްޕީޗް ޑިލޭ...) ދެނެގަންނާނެ ގޮތްތަކާއި، މި ކަންތައްތައް މަދުކުރުމަށް ބެލެނިވެރިންނަށް ހޭލުންތެރިކުރުމުގެ ޕްރޮގްރާމްތައް ބާއްވަވައި، އަދި ހަމައެހެންމެ ކުދިންގެ ފަރާތުން ފެންނަ މިކަހަލަ މައްސަލަތައް ކުޑައިރު ދެނެގަންނާނެ ގޮތްތަކާއި، މި ކަންކަމުން އަރައިގަތުމަށް ބެލެނިވެރިންނަށް ކުރެވިދާނެ ކަންތައްތަކާއި، ކުދިންނަށް ދެވިދާނެ ތެރެޕީތަކާއި ގުޅޭ މަޢުލޫމާތު ބެލެނިވެރިންނަށް ދިނުން. މިފަދަ މައްސަލަތައް މިހާރުވެސް އިތުރުވަމުންދާކަން ފާހަގަކުރެވެއެވެ.

ސްކޫލުގެ ކޮމްޕިއުޓަރ ލެބަށް ބޭނުންވާ ސާމާނު ހަދިޔާކުރުން

ސްކޫލުގެ ކޮމްޕިއުޓަރ ލެބަށް ބޭނުންވާ ސާމާނުތައް ހޯދައިދީ އެތަކެތި ސްކޫލަށް ހަދިޔާ ކުރުން

ދަރިވަރުންނަށް ކުރާނެ މަންފާތައް:
1. ޒަމާނީ މަޢުލޫމާތު މުއްސަނދިވުން : އައު ކޮމްޕިއުޓަރުތަކުގެ އެހީގައި ދަރިވަރުންނަށް އިންޓަރނެޓް މެދުވެރިކޮށް ދުނިޔޭގެ އެކި ކަންކޮޅުތަކުގައި ހިނގާ ކަންކަމާއި، ތަޢުލީމީ އައު ހޯދުންތައް ވަގުތުން ބަލާލުމުގެ ފުރުޞަތު ލިބިގެންދާނެއެވެ.
2. ޝައުޤުވެރިކަމާއެކު އުނގެނުން: ފޮތްތަކުން އެކަނި ކިޔެވުމުގެ ބަދަލުގައި، ވީޑިއޯއާއި އެނިމޭޝަން ފަދަ ވަސީލަތްތައް ބޭނުންކޮށްގެން ކިޔެވުމުން، ދަރިވަރުން ފިލާވަޅުތަކަށް ދޭ ސަމާލުކަން އިތުރުވެ، ދަސްކުރަން ފަސޭހަވާނެއެވެ.

މުދައްރިސުންނަށް ކުރާނެ މަންފާތައް:
1. ކިޔަވައިދިނުމުގެ ފެންވަރު މަތިވުން: މުދައްރިސުންނަށް މަލްޓިމީޑިއާ ވަސީލަތްތައް ބޭނުންކޮށްގެން މާޝައުޤުވެރި ގޮތަކަށް ފިލާވަޅުތައް ތައްޔާރުކޮށް ހުށަހެޅުމުގެ ފުރުޞަތު ލިބިގެންދާނެއެވެ.
2. ވަގުތު ސަލާމަތްވުން: ކޮމްޕިއުޓަރ ލެބުގެ ވަސީލަތްތަކުގެ އެހީގައި ދަރިވަރުންގެ މަސައްކަތްތައް ބެލުމާއި، ނަތީޖާ ތައްޔާރުކުރުމާއި، ކިޔަވައިދިނުމަށް ބޭނުންވާ ރިފަރެންސް މެޓީރިއަލްސް ހޯދުމަށް މުދައްރިސުންނަށް ފަސޭހަވެ، ވަގުތު ސަލާމަތްވާނެއެވެ.

ޖުމްލަގޮތެއްގައި ބަލާއިރު، ސްކޫލުގެ ކޮމްޕިއުޓަރ ލެބަށް މިދެވޭ ހަދިޔާއަކީ ސްކޫލުގެ ތަޢުލީމީ ފެންވަރު މަތިކުރުމަށާއި، ޓެކްނޮލޮޖީގެ ރޮނގުން ކުރިއަރާފައިވާ ޖީލެއް ބިނާކުރުމަށް އެޅޭ ވަރަށް މުހިންމު ފިޔަވަޅެކެވެ. މިފަދަ ވަޞީލަތްތަކުގެ ސަބަބުން މުޅި މުޖުތަމަޢަށް އޭގެ ހެޔޮ އަސަރު ކުރާނެކަން ކަށަވަރެވެ.

އަންހެނުންނަށް ހާއްސަ ކަސްރަތު ޕްރޮގްރާމްތައް (ބޫޓް ކޭމްޕް)

އަންހެނުންގެ ދުޅަހެޔޮކަމާއި ހަށިހެޔޮކަން އިތުރުކުރުމަށްޓަކައި، ރަށު ފެންވަރުގައި ތަރުތީބުކުރެވިފައިވާ ކަސްރަތު ހަރަކާތްތައް ނުވަތަ 'ބޫޓް ކޭމްޕް' ތައް ހިންގުން. މީގެ މަޤްސަދަކީ އަންހެނުންނަށް ރައްކާތެރި މާހައުލެއްގައި، ފަސޭހަކަމާއެކު ހަށިގަނޑަށް ބޭނުންވާ ކަސްރަތުތައް ކޮށް، ދުޅަހެޔޮ އާދަތައް އަށަގެންނެވުން.

ފަންނީ ކޯޗިންގ ޕްރޮގްރާމްތައް

ކުޅިވަރުގެ ދާއިރާއިން ކުރިއަށްދާން ބޭނުންވާ ފަރާތްތަކަށް ބޭނުންވާ ފަންނީ ތަމްރީނު ދިނުމަށްޓަކައި، ޚާއްސަ ކޯޗިންގ ޕްރޮގްރާމްތައް ހިންގުން. މީގެ ސަބަބުން ކުޅިވަރުގެ ފަންނީ ހުނަރުވެރިން އުފެދި، ކުޅިވަރުގެ މައިދާނުގައި މި ރަށުގައި ފާހަގަކޮށްލެވޭ ފަދަ ނަތީޖާތަކެއް ހޯދުމަށް މަގުފަހިވާނެ.

ދުޅަހެޔޮ ދިރިއުޅުމަކަށް ހޭލުންތެރިކުރުމުގެ ޕްރޮގްރާމް

ބަލިތަކުން ރައްކާތެރިވެ، ދުޅަހެޔޮ ދިރިއުޅުމެއް އުޅުމަށްޓަކައި މުޅި މުޖުތަމައަށް އަމާޒުކޮށްގެން ހޭލުންތެރިކުރުމުގެ ޕްރޮގްރާމްތައް ކުރިއަށް ގެންދިއުން. މީގެ ތެރޭގައި ރަނގަޅު ކާނާ ބޭނުންކުރުމާއި، ނަފްސާނީ ދުޅަހެޔޮކަމާއި، އަދި ދާއިމީ ބަލިތަކުން ސަލާމަތްވުމަށް ދިރިއުޅުމުގެ އާދަކާދަތައް ބައްޓަންކުރާނެ ގޮތުގެ އިރުޝާދު ދެވޭނެ.

މޫދު ކުޅިވަރު ނުވަތަ ވޯޓާ ޕާކް ތަރައްޤީކުރުން

ރަށުގެ ބީޗް ސަރަހައްދުގައި ކުޑަކުދިންނާއި ބޮޑެތި މީހުންނަށް ޚާއްސަ 'ވޯޓާ ޕާކެއް' ގާއިމުކުރުން. މީގެ ސަބަބުން މޫދު ކުޅިވަރުތަކަށް އިތުރު ދިރުމެއް ލިބި، އާއިލާތަކަށް އެކުގައި އުފާވެރި ވަގުތުކޮޅެއް ހޭދަކޮށްލެވޭނެ މާހައުލެއް ބިނާވެގެންދާނެ.

އިންޑޯ ޗިލްޑްރެން ޕްލޭއިން ޕާކް

ހުރިހާ މޫސުމެއްގައިވެސް ކުޑަކުދިންނަށް ބޭނުންކުރެވޭނެ ފަދަ ޒަމާނީ 'އިންޑޯ ޕްލޭއިންގ ޕާކެއް' ބިނާކުރުން. މި ޕާކުގައި ތަފާތު ކުޅިވަރުތަކާއި ހަރަކާތްތައް ހިންގޭނެ އިންތިޒާމު ހަމަޖައްސައި، ކުޑަކުދިން ސްކްރީނާއި ދުރުކޮށް ހަށިހެޔޮކަން އިތުރުކުރުމަށް ފުރުސަތު ހުޅުވާލެވޭނެ.

އިންޑޯ ޖިމްގެ ޚިދުމަތް ކަށަވަރުކުރުން

ޒަމާނީ ވަސީލަތްތަކާއެކު ހުރިހާ ފަރާތްތަކަށްވެސް ކަސްރަތު ކުރެވޭނެ ފަދަ 'އިންޑޯ ޖިމް' އެއްގެ ޚިދުމަތް ލިބޭކަން ކަށަވަރުކުރުން. މީގެ ސަބަބުން މޫސުމަށް ބެލުމެއްނެތި، ފަސޭހަކަމާއެކު ދިރިއުޅުމުގެ ބައެއްގެ ގޮތުގައި ކަސްރަތު ކުރުމުގެ ފުރުސަތު ކޮންމެ މީހަކަށްވެސް ލިބިގެންދާނެ.

ކޮންފަރެންސް ސެންޓަރެއް ގާއިމުކުރުން

ސަރުކާރާ ގުޅިގެން ރަށުގައި ޒަމާނީ 'ކޮންފަރެންސް ސެންޓަރެއް' ބިނާކުރުމަށް މަސައްކަތްކުރުން. މީގެ ސަބަބުން ސަރަހައްދީ ފެންވަރުގައި ބާއްވާ ބައްދަލުވުންތަކާއި ތަމްރީނުތަކަށް އެހެން ރަށްރަށުގެ މީހުން ޒިޔާރަތްކޮށް، ރަށުގެ ގެސްޓްހައުސް ވިޔަފާރިއާއި އެހެނިހެން ކުދި ވިޔަފާރިތައް ފުޅާވެ، ރަށުގެ އިޤްތިސާދަށް ބޮޑު ކުރިއެރުމެއް ލިބިގެންދާނެ.

ތިމާވެއްޓާ ރައްޓެހި ގޮތެއްގައި ކަށިވެލި ނެގުމުގެ އިންތިޒާމު

އެންވަޔަރަންމަންޓް މިނިސްޓްރީގެ ލަފާއާއި ހުއްދައިގެ މަތިން، ތިމާވެއްޓަށް ލިބޭ ގެއްލުން ކުޑަވާނެހެން ކަށިވެލި ނެގުމަށް ހާއްސަ ސަރަހައްދެއް ކަނޑައެޅުމަށް މަސައްކަތް ކުރުން. މީގެ ބޭނުމަކީ ރަށުގެ ގުދުރަތީ ރީތިކަން ހިމާޔަތްކުރުމާއެކު، އާންމު ދިރިއުޅުމުގެ ބޭނުންތަކަށް ބޭނުންވާ ވަސީލަތްތައް ހަމަޖެހިފައިވާ އުސޫލެއްގެ ތެރެއިން ލިބޭނެ މަގު ފަހިކޮށްދިނުމެވެ.

މާމެންދޫ-ހުޅެމެންދޫ ފާލަމަކުން ގުޅުވާލުމާއި ޓޫރިޒަމް ހަބެއް

މާމެންދޫ އާއި ހުޅެމެންދޫ ފާލަމަކުން ގުޅުވާލުމަކީ އަޅުގަނޑުމެންގެ ބޮޑު އަމާޒެއް. މި މަޝްރޫޢު ކުރިއަށް ގެންދާނީ ކައުންސިލް ބަޖެޓާއި، ރަށުގައި މަސައްކަތްކުރާ ސަރުކާރު ކުންފުނިތަކުގެ ސީ.އެސް.އާރުގެ އެހީގައެވެ. މީގެ ސަބަބުން ހުޅެމެންދޫގެ ހަޤީޤީ މަންފާ މާމެންދޫ ރައްޔިތުންނަށް ފުރިހަމައަށް ލިބިގެންދާނެއެވެ. މި ތަރައްޤީގެ ދަށުން ހުޅެމެންދޫގެ އެއްފަޅި މާމެންދޫ ރައްޔިތުންނަށް ހާއްސަ ޕިކްނިކް ސަރަހައްދެއްގެ ގޮތުގައި ތަރައްޤީކުރާއިރު، ދިގުރަށާވީ ފަޅި ޒަމާނީ ޓޫރިޒަމް ހަބެއްގެ ގޮތުގައި ތަރައްޤީކޮށް، ރަށަށް އާމްދަނީ ލިބޭނެ އާ ދޮރުތަކެއް ހުޅުވާލާނަން އިންޝާﷲ.

ނޭޗާ އެންޑް ހެރިޓޭޖް ޕާކު: ތާރީޚާއި ސަގާފަތުގެ ދިރުން

ރަށުގެ ގުދުރަތީ ރީތިކަމާއި މުއްސަނދި ތާރީޚު ރައްކާތެރިކުރުމަށް 'ނޭޗާ އެންޑް ހެރިޓޭޖް ޕާކެއް' ގާއިމުކުރުން. މިތަނުގައި ކާބަފައިންގެ ދިރިއުޅުމާއި މަސައްކަތްތެރިކަން ދައްކުވައިދޭ ނަމޫނާ މޮޑެލްތަކާއި، މާމެންދޫގެ ތާރީޚީ ޝަޚްޞިއްޔަތުންގެ މަޢުލޫމާތު ފެންނަން ހުންނާނެއެވެ. މީގެ ސަބަބުން ކައިރި ރިސޯޓުތަކުގެ ފަތުރުވެރިން ރަށަށް އައުން އިތުރުވެ، އެމީހުންނަށް އާ ތަޖުރިބާއެއް ލިބި، ރަށުގެ ވިޔަފާރިތަކަށް މަންފާވުމުގެ އިތުރުން، އަންނަން އޮތް ޖީލުތަކަށް އަމިއްލަ ވަޒަނުގެ ތާރީޚާއި އިލްމު އުނގެނުމުގެ ރަނގަޅު ފުރުސަތެއް ފަހިވެގެންދާނެއެވެ.

އިލްމީ މުޖުތަމައަކަށް ޒަމާނީ ލައިބްރަރީއެއް

ރަށުގެ ދަރިވަރުންނާއި އިލްމު ހޯދަން ބޭނުންވާ އެންމެހާ ފަރާތްތަކަށް ހާއްސަކޮށްގެން، ޒަމާނީ ވަސީލަތްތަކާއެކު 'ލައިބްރަރީއެއް' ތަރައްގީކުރުން. މިއީ ހަމައެކަނި ފޮތް ކިޔާ ތަނަކަށް ނުވެ، ދިރާސާކުރުމާއި އުނގެނުމުގެ މާހައުލެއް ބިނާކޮށްދޭނެ މުހިންމު މަރުކަޒަކަށް ވެގެންދާނެ.

މަސްވެރިންނަށް ހާއްސަ "ފިޝިންގ ޖެޓީ"

ރަށުގެ އިރުމަތީ ފަރާތުގެ ފަޅުތެރެއަށް ބޭރުވާ ގޮތަށް ހަދާ މި ހިތްގައިމު ޖެޓީއަކީ، އިރުއަރާ މަންޒަރުގެ ފުރިހަމަކަން ބަލާލުމާއި، ސްޕޯޓްސް ފިޝިންގްގެ އުފާވެރިކަން ހޯދުމަށް ތަރައްޤީކުރެވޭ ޖެޓީއެކެވެ. މިއީ ޒުވާނުންގެ ހުނަރުތަކަށް ދިރުންދީ، އާއިލާތަކުގެ ގުޅުން ބަދަހިކުރުމަށް ރަށުގެ ރީތިކަމުގެ ތެރެއިން ބިނާކުރެވޭ އިޖްތިމާޢީ އަދި އިޤްތިޞާދީ މުހިންމު ނަރެހަކަށް ވެގެންދާނެއެވެ.

ވޮކޭޝަނަލް ޓެރެއިނިންގ ސެންޓަރެއް ޤާއިމުކުރުން

ރަށުގެ ލޮބުވެތި ރައްޔިތުންނަށް، ޚާއްސަކޮށް އުއްމީދީ ޒުވާނުންނާއި ސްކޫލް ނިންމާ ދަރިވަރުންނަށް އަމާޒުކޮށްގެން، އަމަލީ މަސައްކަތާއި ހުނަރު ދަސްކޮށްދޭނެ 'ވޮކޭޝަނަލް ޓްރޭނިންގ ސެންޓަރެއް' ރަށުގައި ޤާއިމުކުރުމަކީ އަޅުގަނޑުމެންގެ އެންމެ އިސް އެއް އަމާޒެވެ. މި މަޝްރޫޢަކީ ރަށުގެ އިޤްތިޞާދު ވަރުގަދަކޮށް، ޒުވާނުންނަކީ އަމިއްލަ ފައިމައްޗަށް ތެދުވެފައިވާ، ހުނަރުވެރި ބަޔަކަށް ހެދުމަށް އެޅޭ މުހިންމު ފިޔަވަޅެކެވެ. މިކަން ހާސިލްކުރުމަށްޓަކައި، ތަޢުލީމު ވުޒާރާއާއި، ސަރުކާރުގެ ކަމާބެހޭ އެންމެހާ ވުޒާރާތަކާ ގުޅިގެން ހަރުދަނާ މަސައްކަތްތަކެއް އަޅުގަނޑުމެން ކުރާނަމެވެ.

ބަދިގެ ކުނީގެ މައްސަލައަށް ދާއިމީ ޙައްލެއް ހޯދުން

މިހާރު ބަދިގެ ކުނި އުކާލުމަށް ކައުންސިލުން ބޭނުންކުރަމުން އަންނަ ސަރަޙައްދަކީ، ރަށުގެ ރީތި ތުޑީކޮޅާ ކައިރި ސަރަޙައްދަކަށް ވުމުން، މިއީ ރައްޔިތުން އެދޭ ގޮތް ނޫންކަން އަޅުގަނޑުމެން ގަބޫލުކުރަމެވެ. އެހެންކަމުން، ތުޑީކޮޅާ ކައިރިއަށް ކުނި އެޅުން ހުއްޓާލައި، ރަށުގެ ރީތިކަން ނުގެއްލޭނެ ފަދަ ޙައްލެއް މި މައްސަލައަށް އަޅުގަނޑުމެން ހޯދައިދޭނަމެވެ. އަޅުގަނޑުމެންގެ އަމާޒަކީ، ރައްޔިތުންނަށް އުނދަގޫނުވާނެހެން ކުނި މެނޭޖްކުރާނެ ހަރުދަނާ ނިޒާމެއް ޤާއިމުކުރުމެވެ.

އިސް ރައްވެހިންނަށް އަޅާލުން

އިސް ރައްވެހިންގެ ގާތަށް ޒިޔާރަތްކޮށް، އެމީހުންގެ ހިޔާލުތައް ކަންކަމުގައި ހޯދުން. މީގެއިތުރުން، އިސް ރައްވެހިންނަށް ހިތްހަމަޖެހުމާއި އުފާވެރިކަން ލިބޭނެ ފަދަ މާހައުލެއް ގާއިމުކޮށްދީ، ދުވަސްވީ މީހުން ޝައުގުވެރިވާ ފަދަ ތަފާތު ކުޅިވަރުތައް ކުޅެވޭނެ އިންތިޒާމުތައް ހަމަޖެއްސުން.